2016年3月25日星期五

無言的結局之洗版

無言的結局之洗版

講開洗版,其實我都唔知究竟係乜?只不過間中聽到fb有啲帖文會被網民洗版。


為咗上一篇留言被消失,我幾失望㗎(對谷歌一而再的舉動),因為冇得互動,所以我就做咗呢個咁無聊嘅動作,算發洩下也算是抗議喇!

再講,如果有日谷歌所有網站都破人洗版(衝擊)?你話啦,佢會唔會諗到呢句話:「早知今日,何必當初」。而我就會再加多句:「唉!情何以堪呢!」

以下留言係由電郵度收到㗎,我諗或者仲有啲收唔到?不過我登出嚟就係唔想啲回應寃死?

雖然話係「無言的結局」,但我都唔想咁無聲無息!

 **********************************************


Robert wong:
恕少,你們紐西蘭有便宜新鮮羊扒,香港是急凍的,味道差天共地 !
註: 到現時為止,就只有Robert兄最夠面子是唯一可被谷歌擺上架!


盧翠兒:
嘩!D羊扒好正呀?睇見都流口水,我地永遠都買吾到咁平。
粵音字彙更正,睇下都開心,不過好多字我都吾識寫。


Philip CHU:     
Shu兄,羊扒咁平,有無大量入貨呀? 你呢個VIDEO係內地電視台嘅王牌節目!我喺往年都睇過,主持人好生鬼, 呢啲形容詞確實幾得意!

May May:
1. 辛苦曬啦, 又做好野吃, 又教廣東話哈哈,! 現在好多歌手唱歌都有懶音啦,
都是羊扖吸引我多D, 好正呀, 飲返杯紅酒先啦, 如心兄 ! 呵呵~~
2. 那視頻也不是什么內容, 唔關事, 谷歌本身有問題, 今早我也看不到只微在我博留言, 無法啦, 都搞唔掂。
明白架 !

Wan chan:
1. 羊肉比較鍾意食黑草羊,冇咁大羊羶味,但係羊肉價不嬲貴過其他肉類,你處居然仲有咁平,真係要唔好客氣食多啲咯。
2. 羊肉比較鍾意食黑草羊,冇咁大羊羶味,但係羊肉價不嬲貴過其他肉類,你處居然仲有咁平,真係要唔好客氣食多啲咯。(再贴一次看看有冇Delete)

Tomdelay C:
1. 羊咩咩!............
笑騎騎!
2. 小安無噪,不要delete,留下來抗議他也好的!
我用舊方法去recover 都無用了,google 可能知道這方法,又在程式上出新“橋” 吧!

大夫行傳:
戇狗狗 ngong dog dog 羶羶都係羊 買肉養妻房 天時冷 生羌當歸羊肉湯 女人補品 如心小心流鼻blood

eva kam:
平到笑,香港羊肉都唔平。

Ai insky:
哇,有得食又有得學野! 講真,講野就用廣東,寫野有時就唔中意用廣東話,因為好多廣東話字我真係唔知點寫.

Wong Shuk:
1. 我之前冇留言、而家試吓睇吓收唔收到、但如果没收左你又点知呢?

2. 咁神奇?真係冇咗喎。

Li J:
真係抵到無朋友呀!碟羊扒飯賣相好得!

Kent Luk
哈!喺博客好少人用粵語(係廣束白話至啱)嚟寫,老雨唔鍾意用「的的了了」嘅「語體文」(也是白話文其中一種),因為白話文係根据地方方言變化出唔同嘅風格。雨嫂話睇唔明喎,所以最近少寫呢啲廣東白話。
寫得好好喎,不過老雨好衰,專捉錯處....嗱,用腦嘅係「諗」,「想」都係用腦,不過係欲望同心念。「最近太太話好想吃羊扒」個「想」字用啱嘞,不過個「吃」字,廣東佬冇人話「吃咗飯未」...「點都冇想過會平到七個九毫九」,應該係用腦「諗」,啱唔啱呢?咭咭
走呀,如心仲斬緊羊骨,佢嗱住把刀過緊嚟....走得快好世界。

Wien ohtria
等我記抵啲粵音字彙先.

秋葉阿
:
1. 在十幾年前已經有不同年齡的人愛說懶音。成年人、老年人、學者、教授都有。他們以此為榮,不讓小孩子專美 !
“過、個” 不分,“國、各” 不分,“光、江” 同音。
最難過的是 : 有一天我打開一份派到本苑的免費報章,裡面有個專欄寫作人,筆下竟然出現了「個去」這個名詞 ! 證明了懶音可以淪落到如此謬誤的地步。
2. 如心提供的這個廣州話疊字形容詞表,真是很有趣 ! 也是我們在日常生活上都會說到的。其中只是稍有些不同的說法吧了。
也不保證在幾十年後,又會有更多的不同了。
3. 老表,睇見你啲羊肉真係流晒口水,嘩 ! 好豐富的羊扒餐。 或者說真是食指大動了。嫂夫人真是有口福了 ! 識得把肥肉除去,是很的健康做法。抵讚 !


註: 我曾發文”因谷歌版面不能留言, 很抱歉......
不過, 我發現還有一法或者可留言得到,就是在已看到的留言下去寫你的留言!
但是, 今次可以? 而下次呢又不知會點?”


4.老表,我曾經留了兩則的留言都不見了。遲些再來留過。
上面你轉載網絡的粵音字彙裡的疊字形容詞很有趣,特此商借作為個人新網誌的部份內容。先此道謝 !


哈哈…以上留言果然可看到了!


Stella Luk:
羊肉少吃,怕始終有羶味。

AH Gwai:
我仲想留言幾百字添,既然會被刪,算咯。祝安。騎騎騎…

 p Wong:
哇哈哈…
草我跟住D 字同音,口嗡嗡!
我自己都忍唔住笑咗出嚟呀!
仲有,羊扒我都鍾意,唔怕佢騷啍啍!哈哈…

殷師奶:
真係好鬼平喎,仲要大大舊又可以分2餐食,我真係得個睇字.......

 
 


唔好勞氣,就讓大家笑一笑罷!
      此圖轉載自網上


2016年3月24日星期四

教大家兩句新成語和我用粵語寫的帖文

啲羊扒差唔多有成個kilo
切咗八塊都唔細件㗎
 
 
 
 
 
配糙米飯、菜芯、煎番茄,洋蔥汁。


教大家兩句新成語和我用粵語寫的帖文

1. 羶解人意

最近太太話好想吃羊扒,但我搵嚟搵去都搵唔到啲又平又靚嘅;如果要俾成三十蚊個kilo (kg) 我又唔捨得,反正十蚊同三十蚊喺我嚟講都差唔多,分別係多舊骨同多啲肥羔啫!

今年都唔知點解,啲羊肉會賣得咁平?就冇幾耐之嘛,急凍同新鮮羊肶都試過幾次賣八個九毫九($8.99),而呢個價錢真係冇見咗好耐。是關我哋呢邊超市啲肉價係個個星期唔同,好似今個星期咁,賣九個九毫九,而下個星期賣十四個九毫九又或十七個九毫九都有可能。至於上面講嘅$8.99,我已覺得係冇乜可能㗎啦,點知今個星期啲「羊扒」仲要平多些少,真係好難想像,知道嘛…係「羊扒」唔係羊肶呀!

羊扒,點都冇想過會平到七個九毫九。你估以前咩,我記得喺82年,半邊Spring Lamb 賣8蚊我就已經O晒嘴。

但係,又咁啱我哋想食就有呢個十年難得嘅超筍價,所以我同老婆講,啲羊呀…死得雖然好寃枉好冇價值,不過又真係幾「羶解人意」㗎!

「吃了便宜又賣乖」,我諗你哋一定會咁鬧我,但我又諗下…你哋唔會咁小氣啩?

再埋嚟睇下,原本四大塊都係7個幾8蚊紐幣,而家我將佢切成8份,哈哈…分兩餐,計起上嚟每餐都唔使港紙20蚊,而且仲係我哋兩個人食㖭……

感覺好似又賺咗!



未起骨起肥羔之前
起完後啲肉有兩磅半咁上下
  啲羊骨黐住好多肉,到天氣凍時煲兩次湯就啱啱好。


2. 除笨有羶

前日又到超市,睇到包好靚嘅下欄羊肉,雖然有骨有肥羔,但咁平又點忍得手唔買,原本$14.48,宜家賣五蚊,除去骨頭我磅過有兩磅重,肥羔大約一磅,剩番啲肉就有兩磅半咁多,而且嗰啲羊骨仲黐住好多肉㗎,遲啲天口凍煲湯就最啱。

咁你話喇…係唔係「除笨有羶」?


後記:

早排有啲人搞搞震,扯起簡繁字體爭拗。而又冇幾耐更翻炒以普通話為統一語言,仲話要排除粵語。

咁你話得唔得呢?而我就話冇乜可能,只要睇下每個地方有咁多俚語、俗語,同埋時不時都有潮語産生,講句唔好聽,就算好勤力讀書都未必識得晒,仲話要啲早已入晒腦嘅嘢嘔返出嚟?咁不如掉轉嚟叫佢哋齊齊學講廣東話好啦……

話時話,宜家仲有好多香港人講廣東話唔正,好似網友秋葉以下的一段感慨話就可以說個大要…

「好笑在不單止年青人習慣說懶音,有些老年人也跟潮流去說成為習慣 ,更顯得礙耳 ! 年青人一方面要悍衛粵語,一方面又大說懶音,使正音消失 ! 原本是「過去」,現在人人都說是「個去」了 !
有日在電視上聽到一個「本土」牽頭的青年錄音的話,他煞有介事地說:「寧為玉碎,不作 “阿” 全 ! 」這個懶音,給我提供了很多的樂趣。
往日粵劇界的曲詞是粵音經典,可是發覺新一代的粵劇接班人,竟然也唱出了懶音來,很心痛 ! 人不滅你,自己已經在自毀長城了 ! 」

再講,其實用廣東話寫文章都幾難㗎,因為識講啲字都未必識寫!

以下是些在網絡上看到的粵音字彙,雖字音可能會與日常不同,但也希望可以拋磚以求引玉!

黃黚黚 wong gam gam
靑咇咇 ceng bi bi
紅噹噹 hung dong dong
紅卜卜 hung bok bok
白雪雪 baak syut syut

白皚皚 baak sai sai
黑鼆鼆 hak mang mang

烏黢黢 wu zeot zeot
光掁掁 gwong caang caang

香噴噴 hoeng pan pan
臭崩崩 cau bang bang

高戙戙 gou dung dung
矮腯腯 ai dat dat

長拉拉 coeng laai laai
短切切 dyun cit cit

軟腍腍 jyun nam nam
硬觥觥 ngaang gwang gwang

腍啤啤 nam be be
脆卜卜 ceoi bok bok

瘦蜢蜢 sau maany maany
肥嘟嘟 fei dyut dyut

滑捋捋 watt lyut lyut
嚡熠熠 hai sab sab

熱辣辣 jit laat laat
涼浸浸 loeng zam zam

濕趿趿 sap ted ted
乾噌噌 gon zang zang

散搜搜 soan sau sau
密卙卙 mat zap zap
疏秝秝 so lik lik

厚疊疊 hau dap dap
薄窃窃 bok cit cit

輕泡泡 heng paau paau
重耷耷 cung dap dap

生勾勾 saang ngan ngan
死咕咕 sei gwu gwu

淡茂茂 taam mau mau
甜㖿㖿 tim je 
je
酸微微 syun mei mei

頭耷耷 tau dap dap
眼濕濕 ngaan sap sap
口擘擘 hou maak maak
面懵懵 min mung mung
嘴尖尖 zeoi zim zim
儍更更 so gaang gaang
懵盛盛 mung sing sing
戇居居 ngong geoi geoi
烏瀡瀡 
wu seoi seoi



相聲之廣州話趣 (黄俊英)


http://www.youtube.com/watch?v=BigwV-b9tyE&list=RDBigwV-b9tyE



2016年3月15日星期二

很無聊的西瓜遐想

 

無聊的西瓜遐想

這西瓜最近買的,磅過有4公斤半重。

其實係不論大細通通都3蚊一個,真係便宜到笑。

吃的時候便想起了……

年輕時,有一次與幾個同事到新界朋友家處過夜兼BBQ

吃喝玩樂後便有人抬出了個大西瓜。

這時有一個平日很木納寡言的同事,很奇怪他為何會走出來(可能玩得開心罷)並且大大聲聲說:「我咁大個仔都未切過西瓜,咁就等我今日嚟破。」

誰知這一說卻引來哄堂大笑,知道何解嗎?

原來那時已有一同事質詢了真相。

「大舊,乜你今日先至係第一次破瓜?」


: 此篇是試驗性質想看看谷歌留是否正常返?



2016年3月8日星期二

情尋飽 ……(六)忘年戀戀的甜品

 
 
 
 
 

情尋飽 ……(六)忘年戀戀的甜品

話要回說到七十年代。

那時候尖沙嘴有間頗負盛名的餐廳,中文名字土氣不說也罷,但她卻改了個很不俗的歌曲名稱,“La Bamba ”Restaurant ,雖則名字動聽,但始終是那個年代,restaurant 之後便也串連著一大堆字頭,cake shoppancake corner discotheque night club & bar Complex

除此之外,想亦最惹人注目的,是在店外貼示了聲稱可以做到 “one minute service”。亦即是說,客人坐下不到一分鐘便有待應來個招呼,又如落單叫了飲品,那送遞速度確也驚人,通常都可在一兩分鐘內到達。

其實要說的很多,為了不使其厭煩,我就只揀pankcake corner 說說。那時的我,認定西餐廳本是吃牛排的地方,至於甜品也僅限於甚麼甚麼忌廉蛋糕,又或是雪糕新地之類等等。所以當我第一次聽到,和見到這薄如布紗甜品時候,可想而知那印象是有多麼深刻!

這餐廳可算十分豪華,差不多全用上真皮疏化(座椅),嵌入的銅釘雖帶點俗氣,但閃閃亮的又似乎貴氣很多,然再在那厚厚綿綿地氈上行走,人的骨頭也像騷軟了的飄向另一個層次!

餐廳有三個入口,從尾門進來便是那pancake corners 地方,不怎麼大,位置就恰如在餐廳裏一角;看起來有點像日本的鐵板燒,一個“ L ”形的吧枱,食客可直接看到 pancake 的製作過程。

當年這甜品並不普及,一般而言,稱得上高級餐廳的基本沒一間懂得怎做,而剩下的就唯有那少數的幾間酒店。

然而,這老闆是從那裡學來這方面的食譜與製法?據知情人士說,他向外宣稱是旅歐途中得來,但實則卻是從隔不遠處的酒店重金收買了餅師,因而他視此配方如珍寶,並囑傳大內總管的妻舅只許在密室內包裝份量,所以那個甜品師都不過是製作工人而已。

在這裡要先打一個住,何解?因那時我只知有這樣的甜品,至於其它我便一無所知,直至到了1979……

那時我在旺角某職場任事,那裡的老闆本身是一名日本廚師,他收藏了許多飲食書藉,對我亦很信任,所以我可任意參看他的圖書。又因那時自身虛榮感作祟,不自量力偏喜好於繪畫雕刻……記得其中有本是記錄世界著名冰雕家作品,有幀像是叫奔行中的豹子,那冰刻功夫栩栩如生,精緻得猶如 Swarovski 水晶一樣的璨然奪目。與此同時,我亦看過些關於甜品的書,在無意間我找到了crepes ,圖片上顯示的便是我當年抄下來的份量製法。



之後我也是將它撂在一旁,又直至到了女兒三歲時候……

女兒保姆每年都會為她搞個生日會。而那次,我便拿出殘存於腦海裏的點滴記憶,做了頭一次的成品香蕉忌廉班㦸。


其實,我對此薄餅也認識不深,最為使我難忘的是一道叫美酒煮班㦸(Crepe Suzzette)甜品,聽說是法國有名的餐後甜食。雖然我未吃過,但卻有幸適逢在酒店內,觀看過部長在人客面前烹煮的過程。這正好,我亦想一併的在這裡說說。

首先預備兩至四塊的班㦸皮,將煮食車子推向客人面前,點火並燒燃青銅底不銹鋼鍋子,下牛油,稍熱便落橙青或檸檬青,略煮數秒便將君度橙酒加入,侍那酒氣升騰一會後便倒入鮮榨橙汁,及再煮至濃稠適中,最後將班㦸皮混在那淡淡酒香的汁液中微煮,直到橙汁滿滿的被吸取,那便算是完工了。而我亦有聽聞某些食肆為圖花巧,會在完成的甜品上面加些濃度較高的蘭姆酒,這便可燃起藍藍火焰侍客!

以上忘年戀戀的回憶並不會因火焰而結束。

反而又直至回說到紐西蘭了。

回紐後時間比較多,做這款美食也多了,只是吃得多大家都感到有點厭。

這是一年前的事,因牛油果大造,我忽然心血來潮,便想用牛油果來做個 pancake 𦉘

以下是2015129號我在 G+上發表過的帖文:

 
 
 
 
 

Mashed Avocado mixing with a lightly pancakes batter.

牛油果薄𦉘

早前我曾說過吃不得牛油果,若吃多了會立刻見功的肚子痛……

那次買了四個,吃了一個,兩個做了鬆餅和蛋糕,唉……剩下那個都不知怎打發?


我突然忽發奇想,用牛油果壓出果漿,用做 pancakes 的方法試試,想看看行不行?

哈哈……雖然不太理想,但總算成功了。那口感真像啖著牛油果,而且入口也會溶化在舌尖上呢!


Pancakes batter
份量
9 oz.        flour
1  oz.       castor sugar
1/2 tsp.    salt
2. oz.       butter
17 oz.      milk
3              eggs
1  tsp.      Vanilla essence