鹽燒三文魚頭

下午茶之《鹽燒三文魚頭》

呢兩個三文魚頭好大個（唔知會唔會嚇親你），加埋啱啱一公斤重，本來想夜晚做餸用豉汁蒸……

但下午茶又好似冇乜著落，就諗下不如食咗至算，咁我就問太太，問佢反唔反對？

哈哈，答案？ 其實問都多餘嘅！

真係好扺，做特價計起都唔使三十蚊港紙（正價係NZ$8/kg，大約要四十三港元咁上下），唔知喺香港買又貴唔貴？

PS：吃晒兩個驚多得滯，咁就留番個夜晚喇！

做法：

先將魚頭切開兩邊，用廚酒，磨鹽（要多啲）、黑胡椒及芫茜碎抹勻裏外，醃半個小時以上。

預熱焗爐220度，將魚頭放在疏漏之鋼架上，皮向上，焗七至八分鐘，然後開面火燒面五至六分鐘，之後反轉魚頭，仍用面火烤，約五至六分鐘即成（期間要留意火力避免烤燶）！

吃時配檸檬汁或黑醋，亦可酌量加少許醬油。