過年曲奇
首先跟大家拜個早年，預祝大家全年好景，身體健康，順心如意，豬事大吉！
恭喜發財，恭喜恭喜！
未到豬年，我就已經變咗隻懶豬，好似乜都唔想整唔想做……
可能我太太見咁落去唔對路喎，就即時發起嬌嗔，「半囈半籂」叫我做牛油曲奇，仲成頂高帽笠落我度，話只吃我整的，話出面冇一隻好食。
哈哈！使唔使咁誇張呀…
不過話時話，對老公係要冧下氹下先會郁㗎！
PS：“嬌嗔”，我唔識用廣東話講，係唔係叫「發老脾」，又或叫詐嬌、詐晒型？
2019年1月27日星期日
2019年1月18日星期五
燜燒羊肩膊
燜燒羊肩膊
我好耐都冇給太太讚過……
但她今次終於也說出了口：「老公，好腍好好味喎！」
PS：其實我都係咁諗，喺咁多次之中呢次係整得最好！
做法：
羊肩連骨一塊約1.2公斤
用芥末醬、喼汁、茄汁、檸檬汁、蠔油、生抽、紹酒、糖鹽、黑胡椒碎、孜然粉、芫荽粉、thyme、rosemary 等等，混成醬料塗在羊肩上，最少醃半天。（調味料可因個人喜愛增減）
預熱焗爐220度，焗盤內置水約半杯並放一矮身蒸餸鋼架，羊肩放在其上，用錫紙封密，入爐十五分鐘，然後將爐溫調低至九十度，二十五分鐘。打開錫紙，開面火將羊肩兩面燒至金黃色。之後從焗爐整盤取出，仍用回之前的錫紙封實，待靜止十分鐘便可切片享用！
至於焗盤內的汁液，撇去油份，隔去雜質，加些調味用生粉埋薄獻，就可成為蘸羊肉的汁料！
2019年1月4日星期五
2019年1月2日星期三
鹽燒三文魚頭
下午茶之《鹽燒三文魚頭》
呢兩個三文魚頭好大個（唔知會唔會嚇親你），加埋啱啱一公斤重，本來想夜晚做餸用豉汁蒸……
但下午茶又好似冇乜著落，就諗下不如食咗至算，咁我就問太太，問佢反唔反對？
哈哈，答案？ 其實問都多餘嘅！
真係好扺，做特價計起都唔使三十蚊港紙（正價係NZ$8/kg，大約要四十三港元咁上下），唔知喺香港買又貴唔貴？
PS：吃晒兩個驚多得滯，咁就留番個夜晚喇！
做法：
先將魚頭切開兩邊，用廚酒，磨鹽（要多啲）、黑胡椒及芫茜碎抹勻裏外，醃半個小時以上。
預熱焗爐220度，將魚頭放在疏漏之鋼架上，皮向上，焗七至八分鐘，然後開面火燒面五至六分鐘，之後反轉魚頭，仍用面火烤，約五至六分鐘即成（期間要留意火力避免烤燶）！
吃時配檸檬汁或黑醋，亦可酌量加少許醬油。
2018年11月30日星期五
牛扒，我會點煎？
牛扒，我會點煎？
唔知點講，我好似好識揀牛扒，總之望落去就好似睇靚女，我一定唔會走漏眼。所以，我好矛盾好唔想行超市，因為容乜易定力唔夠變咗肥佬咁就慘喇！而且仲有一樣怕，就係驚個冰箱唔夠大？（笑咗）
唔知點講，我好似好識揀牛扒，總之望落去就好似睇靚女，我一定唔會走漏眼。所以，我好矛盾好唔想行超市，因為容乜易定力唔夠變咗肥佬咁就慘喇！而且仲有一樣怕，就係驚個冰箱唔夠大？（笑咗）
閒話表過，言歸正傳，之前講到我煎牛扒效果很好，快熟和少流失血水就是賣點！
其實做法與西人差不多，我一樣用磨鹽和黑胡椒碎，但我會在臨煎前一分鐘，用少少生粉薄薄的抹在牛扒度……
還有一樣要講，就係牛扒上碟前，很多西餐廚師都會在這個時候放一小塊牛油落煎 pan 同牛扒略煮，十數秒後就贊酒，跟住拎起塊牛扒放喺隻碟，然後煮汁，個 fry pan 唔使洗，落少少喼汁同美極鮮醬油，煮到啲汁稍為企身就可以淋在牛扒上。而呢一個醬汁，亦係我所知嘅gravy 幾十年前的做法！
其實做法與西人差不多，我一樣用磨鹽和黑胡椒碎，但我會在臨煎前一分鐘，用少少生粉薄薄的抹在牛扒度……
還有一樣要講，就係牛扒上碟前，很多西餐廚師都會在這個時候放一小塊牛油落煎 pan 同牛扒略煮，十數秒後就贊酒，跟住拎起塊牛扒放喺隻碟，然後煮汁，個 fry pan 唔使洗，落少少喼汁同美極鮮醬油，煮到啲汁稍為企身就可以淋在牛扒上。而呢一個醬汁，亦係我所知嘅gravy 幾十年前的做法！
2018年10月31日星期三
我唔係神棍
我唔係神棍
近年，好多人都興用慢煮神棍（Sous Vide），而今次我介紹給大家的，係另類的慢煮方法。
當然，做法都是仿效這一種神器！
再說，之前我講過，那次我整的燒排骨有點實，當時就有group友畀咗啲寶貴建議我，她介紹韓燒醃肉方法，比如用蘋果，奇異果，梨子等等，而另一谷友話，用 yogurt 會很好，會 moisture 啲！
今日我綜合了各位意見同埋網上的一些煮食心得，經過消化過濾，我的《慢煮燒豬肋骨》新意念終於誕生了。
結果，比之前好吃多啊，顏色外相雖不大討好，但也可說是差強人意，而我 … 還是一口氣便吃了一半以上！
醃料：
黄豆醬，茄膏，洋葱蓉，薑粉，蒜粉，蘋果蓉，檸檬汁，黃糖，海鹽，胡椒粉，生抽，生粉，蠔油，yogurt，紅酒。
做法：
先去超市買一個密實袋（拉鍊袋）又或焗爐燒烤袋。
將所有醃料醬汁與排骨混匀，放入密實袋裏面數小時至半天。
然後開焗爐，低溫100度左右。
有蓋不銹鋼煲一個，內放熱水，其多少要以能浸過排骨包為主。入焗爐約六個小時，拿出待涼便可放入雪櫃或冰箱備用。用時解凍，取出，將包内醬汁塗抹排骨底面，再入焗爐，190度每邊焗15分鐘，吃時切條狀，配黑醋或喼汁。
註：時間長短，會因各爐溫差别和排骨厚薄大小而有所不同。
2018年10月16日星期二
醉拳雕手
醃後
可以吃了
《醉拳雕手》
今日，我不是想和大家講手，又或談論甚麼「洪劉蔡李莫」，而是… 哈哈，我諗你一定懂得！
愛喝兩杯，喜耍幾下醉拳，這個菜式我相信定必啱你口味……
材料：
豬手四至五隻
薑片四塊
花椒小量約一茶匙
花雕酒半杯
白鹵水三～四杯
蠔油、胡椒粉、生抽適量
鹽適量
冰糖一大塊
冰粒有幾多要幾多
做法：
先將豬手放在鍋中，冷水蓋過，開火，沸滾後轉中火二十分鐘，熄火倒出，用冷水沖洗乾淨。
之後，鍋中再注入清水，與薑片、花椒、豬手，以中小火煮一個小時左右，關火後不開蓋，燜焗多三十分鐘。全程的開煮時間，要視乎豬手的腍度而定，不贅！
煮稔後的豬手亦要以冷水沖凍，然再放入冰水中，這樣做法可使豬手快速降溫，從而令豬皮彈口好吃。
在此前，要先備好約三至四杯的白滷水醃汁。
至於我的白滷水製法，可能與外間不同。我是用白開水（四至五杯）加小滷水包（雜貨店與超市均有得賣），煮滾後用微火慢煮個多小時，然後加小量生抽、蠔油、大塊冰糖、胡椒粉和玫瑰露酒，調好味道就可離火，待凍後就可入雪櫃備用。
醃汁：醃豬手時才可加入花雕，如若想口味重些，也可加大酒的份量，醃汁要盡可能蓋過豬手，醃製時間最好超過一日，那麼味道才能更好的發揮。
至於醃汁，我會用完即棄，又或再灼些雞翼來浸，盡量使其不浪費……
備註：
正所謂南拳北腿，拳與手都是手的部份，這是個南方菜式，所以我才以《醉拳與鵰手》來命名！（一笑）
再：南拳有五大名家，統稱為洪﹑劉﹑蔡﹑李﹑莫，而此五祖籠統估計便是洪熙官﹑劉三眼﹑蔡九儀﹑李錦綸﹑莫清嬌。
至於洪家拳的的源流主幹由洪熙官傳陸阿采，由黃麒英傳黃飛鴻，而至林世榮，林世榮後傳劉湛，林錫釗師幼時即從劉湛學藝，劉湛之子為目前香港知名武術指導劉家良先生，由於片務繁忙，故而現今洪家拳主要的傳承工作即落在林錫釗師傅的身上，林錫釗師傅與劉家良為同輩摯友，有時甚而相邀幫忙電影中的指導或充當工作人員。（抄自網絡）
2018年9月30日星期日
訂閱：
文章 (Atom)