香蕉露芙 Banana Loaf

香蕉露芙 Banana Loaf

問問大家，有冇聽過香蕉露芙呢個名字？答案一定係：「好似有啲熟悉，但又好唔記得噃。」這是因為佢啲姊妹都幾出名架，咪係叫乜乜「泡芙」咯！

咁嘅，一向以來只有叫佢做香蕉餅、香蕉蛋糕或香蕉麵包，係冇一個特定的名稱，而呢個名字係我給佢改嘅，好聽嗎？你知唔知道？長期以來這種食品都係用嗰啲放咗好耐，又或食唔哂兼太熟的爛蕉來做，俾人感覺就有點那個……嗱！而家咁叫法係咪高貴咗好多呢？

講開又講，喺外國地方有好多西人家庭孩子也懂得做這款西餅。因那個時候你若去探人又或別人來探你，通常都不會兩手空空，選擇的只有到餅店買件忌廉餅又或到士多買盒餅乾，其次多是自家做個蕉餅，況且那時的人很客氣，吃剩了更會叫客人帶點回家，因此常常有得吃，吃得多自然厭了，相信已有一段時日沒有吃過。早陣子看到別人日誌寫蕉餅，我也來過見獵心喜，即時摷番當年的食譜，一看原來和這網友的做法份量差不多，加上屋企咁啱有幾隻熟蕉……

個半鐘頭後，唔講都知啦！

材料:
軟牛油 　　100g
糖 　　　　200g
熟香蕉 　　3 ~ 4 隻（大細而定）
雞蛋　　 　1隻
麵粉 　　　300 ~ 320g
發粉 　　　兩茶匙
食用疏打粉 一茶匙
鹽 　　　　半茶匙
玉桂粉　 　一茶匙
合桃仁　　 40g

做法:
1） 先將軟牛油、糖、鹽用攪拌器打起，再慢慢加入雞蛋繼續打至忌廉狀，最後並和已壓爛之香蕉、雲呢拿香油拌勻。

2）預先將焗爐紙置於長方型焗盆內。

3）將麵粉、發粉、食粉、玉桂粉過篩，然後逐漸將之加入以上漿狀物體，要輕輕的混入。再加入合桃仁（可落可不落），然後倒入長方型焗盆內。
注意：不能大力攪拌以妨起筋。

4）放入預熱170c 焗爐, 焗50 分鐘至1 個小時。

5）用長竹簽插入來檢測有沒有黏液，如乾身即表示焗好，取出待涼，然後從焗盆中倒出切件即可。

發佈於2013年6月7日下午5:17

公開累積瀏覽 447